Maria Victoria Haas

Curriculum Vitae

Maria Victoria Haas – moderatura e schurnalista libra, organista, cantadura

Il carstgaun – pluriling e multitalentau

Maria Victoria Haas ei naschida ils 1980 e carschida si a Domat. Ella discuora romontsch, tudestg, spagnol, franzos, engles e talian. Cun siu um e sia pintga feglia viva ella el Tessin. Sper sia lavur scriva ella crimis, mixescha cocktails e boxa. 

La schurnalista e moderatura – focus politica, medias, societad

Dapi ils 2009 lavura Maria Victoria Haas sco moderatura, dapi ils 2020 sco moderatura e schurnalista libra. Grazia a sia plurilinguitad ha ella incumbensas en l’entira Svizra ed ei leu presenta, nua che la Svizra plurilingua s’entaupa. Repetidamein ha ella denter auter moderau l’emissiun naziunala dils 1 d’uost dalla SRG SSR, il concert da Nadal quadriling pils radios dalla SRG SSR ed ils 2020 la fiasta federala sil Rütli
Era sco moderatura d’occurrenzas dalla branscha da medias ei Maria Victoria Haas fetg dumandada. Dapi ils 2015 meina ella tras il SwissRadioDay, ils 2019 ha ella moderau la «International Public Media Conference» a Berna, ils 2020 il SwissMediaForum a Turitg. 
Era el schurnalissem d’actualitad e da politica eis ella da casa. Dils 2009 tochen ils 2017 ha ella moderau l’emissiun da novitads romontscha «Telesguard» sin SRF1. Ella ZHAW ha ella absolviu ina formaziun supplementara en communicaziun politica e profitescha da sia experientscha ord biaras emissiuns da votaziuns ed intervestas cun politicras e politichers. 

La schurnalista e moderatura – focus cultura, religiun, filosofia

Maria Victoria Haas ha studegiau a Berna cant classic. Formaziuns supplementaras han menau ella a New York, Heidelberg e Hamburg. Sco cantadura libra eis ella stada activa sils camps opera, operetta, oratorium e lied ed ha gudignau divers premis. Dapi 25 onns lavura ella sco organista. Malgrad ch’ella ha pil mument terminau sia carriera sco cantadura, ein temas culturals vinavon sia fermezia. Ella ha moderau denter auter per RAI, Arte e la SRG SSR la transmissiun en direct dall’opera «Cavalleria rusticana» da Matera, ha menau tras il film documentar dalla RSI «Un Barbiere a Lugano», ha moderau duront plirs onns il «Premi dil film svizzer» e plinavon la «Saira grischuna rumantscha» ella casa federala, in’occurrenza a caschun dil giubileum da 75 onns dil romontsch sco quart lungatg naziunal. 
Dils 2017 tochen la fin dils 2019 ha Maria Victoria Haas luvrau pil Radio Rumantsch, nua ch’ella ha fatg contribuziuns per l’emissiun da religiun e da filosofia «Vita e Cretta» e per l’emissiun d’approfundaziun «Marella».

Vegni a saver dapli:

Moderaziuns vargadas

Impressiuns en maletg e tun

Moderatura per Voss’occurrenza